احمد الرحمن رب العالمين
خالق الإنسان من ماء وطين
ميسرن الأمر في دنيا ودين
ماحمد غيره لمكروهن سواه
مايلام اللي فجع مثلي فخوه فاقدن من قبل اخوه أمه وابوه
لوأفادي فيه بالفن مافدوه
جعل رب العرش يشمله برضاه
لو نسوك الناس منسى يا سعد
وانت دايم كنت لي وجه السعد
ماحصل لي منك في يومن نكد
من صغر سنك إلى حد الوفاه
كل ماهميت ابكتب بك شعر
تعجز يديني بشعرن أو نثر
بس انا ياخوك مومن بالقدر
وماحصل من دبرة الله وقضاه
الحذر يا خوي مارد القدر
لا كتب شين على احدن مالبشر
ينفذ امره فيه من عسر ويسر
جل شان الله عالن في سماه.
جو معزينا وهم خلقن كثير
والحزن فينا صغيرن مع كبير
وادري أن الموت هو تالي المصير
بس هذي سنة الله في الحياه.
كل همي كان راكان الصغير
هو صغيرن بس يدري وش يصير
يعلم الرحمن وهو بأمري خبير
وش غلا راكان وهو اخر ضناه
قال لي راكان من اليوم انت ابوي
وان كبرت تصير عمي والا اخوي
قلت ياليتي اجي لك مثل اخوي
وانشد اللي من غلا الوالد بكاه
اسمعي مني كلامي يامرام
وبلغي قولي خواتك والعمام
القدر مايمنعه حزن و كلام
وكل مايجري بأمر الله قضاه
احمد الرحمن ربي وأشكره
كل من عزا بخير يذكره
كان هو رجال والا هي مره
من جميع االي لفونا في عزاه
العباد شهود ربي فوق الارض
لو ادور بالوطن طولن وعرض
مالقيت من البشر مدين فرض
غير من يمدحه ويكثر في ثناه
عبدالله بن مهنا المهنا
2019/12/5
1441/4/8
